juknis sajak dan materi sajak
juknis sajak
1. SEUNEU BANDUNG
Karya Karna Yudibrata
2. KAHIRUPAN MA ANAH
Karya Éddo SY
3. LEMBUR
Karya Ny. RH
4. MERI
Karya Apip Mustopa
5. BULANTOK JEUNG SULINTANG
Karya Inda Nugraha Hidayat
1. tanpa harus memberikan teks naskah ke juri
2. puisi wajib di baca. maka peserta wajib membawa teks puisi
3. mengenakan seragam merah putih
4. peserta boleh darikelas 1 sampai kelas 6. kategori untuk putra dan putri
5. membaca seluruh bagian puisi, dari judul bahkan ada tulisan di bawahnya juga.
puisi bisa di salin disini
SEUNEU BANDUNG
karya : Karna Yudibrata
Saha nu bisa mareuman seuneu
Bandung
geni sakti nu nyebrot ti dapur
Cikapundung
najan laut Kidul
ngolétrak dipaké nyiram?
Seuneu Bandung
Dayang Sumbi gupay pucukna
Tangkuban Parahu jadi suluhna
Sut urang sundut
Nyeungeut obor kamerdékaan
Bray caang lampu néon jutaan watt
Langit ngempray, langit harepan
Seuneu teuneung geni kawani
Ngaléntab sagara keusik
Ngahuru, ngabela-bela
Ngaduruk leuweung-ganggong
langit-ganggong
Asia-Afrika bebas Merdéka !
Seuneu nyebrot ti dapur
Cikapundung
Geni sakti, cahya Ilahi
Hamo bisa dipareuman
Panorama, 19 April 1965
KAHIRUPAN MA ANAH
karya Éddo SY
Ma Anah tukang surabi
Saban subuh satia nganti nu meuli
Satuhu usaha ngadago rijki
Ceuk paribasa najan ngan payu sasiki
Ma Anah dagang surabi
Teuing geus ngaliwatan pirang réwu janari
Aya ramé aya sepi
Kauntungan henteu pasti
“Ema gé lin teu hayang jiga batur
Ema yakin rijki mah aya nu ngatur
Ku kituna henteu kudu jadi catur
Gedé leutik Ema tetep ngucap sukur”
Ma Anah tukang surabi
Satia usaha nganti nu meuli
Rék ramé rék sepi
Tetep sumujud ka Gusti.
Ahir April ‘82
LEMBUR
karya Ny. R.H.
Tangkal buah nu ngajaranteng hareupeun imah
Daunna marotah ulin jeung angin
Ranggeuyan konéng di sawah
Séah ngawurkeun kabungah
Segerna hawa ti gunung
Tingtrimna hirup di lembur
Awor jeung sora tikukur
Nu ngelak ‘na pucuk kawung
Tangkal buah hareupeun imah
Kiwari geus robah jadi pipah nu pamaréntah
Nu baréto mangrupa sawah
Ayeuna jadi parik bogana babah
Segerna hawa gunung nu dipigandrung
Geus lawas lunta ninggalkeun kampung
Tingtrim hirup di lembur
Mimiti diranggeum batur
Pangumbaraan, 1976
MERI
Karya : Apip Mustopa
Di alam dunya
Asana moal aya
nu bisa hirup sauyunan
cara meri sabubuhan
Mun nu ngangon nitah ka katuhu
bring ngatuhu
Mun nu ngangon nitah ka kénca
bring ngénca
bari disarada:
Wék! Wék! Wék!
Di alam dunya
Asana moal aya
nu bisa hirup basajan
cara meri saabrulan
Dahar cukup saaya-aya
kumaha nu rék maraban
Mun keur diabur
lolodok di sawah batur
bari disarada:
wék! Wék! Wék!
Oktober 1979
BULANTOK JEUNG SULINTANG
karya : Inda Nugraha Hidayat
Hayang teuing ngajul bulantok
Hanjakal gantarna pondok
Hayang teuing bisa ngalayang
Rék ka langit mipit sulintang
Bulantok sagédé batok
Rék diwadahan kana mangkok
Sulintang kawas ranginang
Rék diwadahan kana rantang
Bulantok teuing ku montok
Hanjakal aya nu maok
Sulintang duka ku caang
Hanjakal aya nu ngenyang
Garut, 1 Juli 2004